第三次廣州自駕雲南（隨機入藏出川版）

18、19兩年春節三個禮拜既雲南自駕之旅繫好好既回憶，其後受疫情同工作既影響，三年都冇自駕去“酒同遠方”喇，碟埋心水好好咁做多D功課，不斷甘改進行程，好多次都十分期盼可以出發。

個仔17歲喇，唔繫好中意跟我兩公婆咁出去，好在佢最好小學同學蔡蔡一家（4人）都計劃去雲南自駕，溝通之下，竟然出發日期初定同我地一樣添，而且好鐘意我地既行程，兩個小朋友就更開心喇。後嚟爲左跟到我地既車程（大理次日達），佢地仲專登提早一日出發添。

準備工作：因爲經已好熟悉，仲要系夏天去，行李就更加簡單喇，不過仲繫帶多左一箱衫（主要系貪靚，各種場景都帶衫，其實去到就賴得換，強烈建議再帶少D）。出發前一日去換埋機油、帶瓦斯爐、公仔麪、白酒洋酒各兩斤。

18、19年春同23年夏既行李、睇到系越嚟越少既

8月4號（禮拜五），工作行得開，中午一點出發，九點幾入住百色溫德姆度假酒店（推薦），出嚟宵左下夜就返去訓覺喇。

5號，五點半出發（百色測速好嚴，好在個底好，超10%都冇處罰），兩家人中午系昆明既服務區匯合，好開心，嗱嗱臨影返張集體相先。四點幾到左大理古城南門，呢邊人少D，停車方便。即刻去整返個雜菌雞煲，醫下個肚先，開酒（有個女司機，可以餐餐飲返杯）！系咁意逛左下古城，天黑前入住洱海邊既大理藍舍海景客棧（服務差、不推薦）。

兩公婆系洱海邊浪漫左一下

6號，雨，兩公婆客棧米線，跟住擔遮逛洱海，新整好既步道爲洱海增色左好多。雲南呢邊天黑得遲，加上行程安排得好，D細路基本可以日日訓到自然醒，所以11點先出發去虎跳峽既香格里拉山美客棧，旅途正式開始。

落左高速，過鬆園橋，系西景線路邊既幺妹鮮魚館食晏（條魚小貴）。到虎跳峽大橋（騰訊地圖，高德冇顯示橋名）果陣，被告知景區因近段時間雨水多水量大封閉左，唔俾過橋（跟住上網搜下，原嚟10點半就封左，怪唔得唔塞車啦）。我地繼續向前開，過橋頭中橋（騰訊地圖）後停落嚟打電話俾客棧老闆娘，佢話可以入去。前後經過三道保安，話系去山美或者直接同客棧通話後都放行，連景區門票都冇得收我地既（兩次嚟都冇入景區，不過19年果次就正常情況下路過都要俾錢）。

客棧前邊有一段長2.4公里、落差350米（不同軟件結果有差異）既十幾個勁斜S彎，水泥鋪裝。好在部車爭氣，抓得得心應手，一D都唔挫，一手過彎，直頭似遊樂場D節目（副駕一直留意上面來車），好吸引。客棧有自己的停車場，可以停六七部車。

山美客棧前的“遊樂項目”

住落，趁雨細，按計劃逆行高路線路約1公里，到達“冰粉”處就返轉頭，當做熱身。雨後既玉龍、哈巴，煙霧繚繞，另有一番美態，全隊人既興致都開始上曬嚟並KEEP住系10幾日既旅程度。

對面依次就係丫叉角莊園、茶馬客棧同山美客棧

落雨、泥濘、水大，小心

狗糧買一送一

飄來榴蓮之香

選擇山美，就係爲左徒步，條件有限，唔會過高要求。晚飯、早餐都系客棧，熱水充足。頭天半夜，線路問題全村停電，第日天黑前修好，影響唔大，好彩我地有帶瓦斯爐同足夠既充電寶。

7號，11點開始高路徒步，天氣很配合，雲、20度左右。半路，一羣牛擋住左去路，兩隻牛公仲爭寵開片添。甘既情況，咩攻略都未見過，大家都冇曬計，系度齋等。好在牛主人夠曬經驗，睇到我地行過甘耐都冇系前面既山坳浦頭，就主動過嚟解圍嘞。

呢杯茶，問你點頂

觀音瀑（唔咁肯定系呢個名，有冇驢友有肯定既答案）

大約一點鐘到左HALF WAY食飯（唔貴、味道麻麻）、系“爽死你陽臺”擺拍、“幫襯”天下第一廁。繼續出發，陽光之下，沿路景色非常漂亮、色彩豐富。到觀音瀑（畀相老闆娘睇，佢話叫觀音瀑。瀑布之前既果段路最窄，系最危險既）既時候，因爲水大，衝住左條小路，加上瀑布前既碎石坡都好危險（應該有小小塌方），我地就返轉頭嘞。返到中途客棧，系陽臺酒吧飲下啤酒、咖啡。果度間士多會提供租車師傅既電話，叫左兩臺車（150一臺）送我們返山美。呢段徒步實際唔夠10公里，基本系平路，唔會太難，帶樽水就可以行得果種。

客棧既晚飯做得好好，唔貴，大家相處真誠融洽，非常感謝客棧。呢間客棧其實都有景觀好好既陽臺，不過冇網紅化遮。

山美招牌黃悶雞，正！

8號，早餐後，出發張老師客棧，徒步其峽谷線路（15一位。有三條線路可以落谷底，另外兩條是“天梯線路”和“一線天線路”），在谷底江中大石拍照，封景區的水量非常洶湧，來得真是時候，無人機派曬用場。

張老師線路谷底大石，十幾日後，呢條石粉路都畀沖走曬。

谷底有一小吊橋與“天梯線路”相通，過去要另外收錢。告知果邊我地剩系過去佢地既吊橋就原路返回，所以只收五蚊位，過其吊橋去江中大石再收10元（19年春節過過一次，水量冇今次大，極力推薦，果年個仔仲未敢行，今次就唔同喇）。回程，爬168級勇士雲梯上嚟（10元位，天梯既老闆娘竟然系琴日系中途接我們返山美既司機），天梯好斜，，加上後段體力差，D後生仔留前鬥後，經已唔見曬人影喇，好在兩公婆互相鼓勵、慢慢爬，一樣上到嚟。呢段谷底徒步成個行程約5個鐘（含大量影相時間），水平距離小，不過就落差好大，已經接近自己體能既極限。

兩條線路分界既吊橋

“天梯線路”谷底吊橋（2019年）

“天梯線路”谷底吊橋（2023年）

“天梯線路”既天梯（2019年）

“張老師線路”天梯

高路、峽谷徒步線路圖（系張老師客棧影既）

差唔多五點返到張老師客棧“午餐”，跟往就出發哈巴村，特登去左以前可以過渡到大具鄉既下虎跳峽，而家起左新既“金沙江橋”，我地開到對岸，無人機開始路拍，好似以爲自己系318甘（後嚟我地真系去左啊！），跟住再專登兜返嚟下虎跳隧道去客棧。東環線系疫情幾年已經改造好曬，好好開，天黑前就趕到左“香格里拉哈巴半山客棧”（推薦）。準備第四站的哈巴露營。

從張老師客棧過嚟，唔入隧道、靠右行，6公里就到金沙江橋過大具鄉

哈巴路上，東環線既彩虹

呢間客棧主要由老闆娘打理，洛桑大哥分管梵塵德拉野奢營地。老闆娘提前同我溝通，約好晚飯人數同時間，我地一到客棧就可以上餸喇，色香味都有，見我帶酒，佢仲請我試下佢閨蜜好中意既當地酒添。客棧既庭院好大，晚黑聞住好香既燜牛腩（第朝早餐），聽歌嘆茶，睇老闆娘好認真甘同聽日爬哈巴雪山的客人上課。

9號，上午，終於見到好忙既洛桑大哥，同佢瞭解營地既情況，覺得好好，決定中午入住。從客棧開去營地要9.5公里，繫好窄既盤上路，最後一大段仲系碎石路添，要慢慢開，用左九個字先到營地。營地系半山，高山草甸地貌，靚到痹。入住後，營地有個毅毅小朋友同我地好啱KEY，主動帶我地採牛肝菌，有“專家”帶住，俾我地搵到拳頭甘大既。第一次，大家都做曬“小姑娘”喇。大哥講系火把節，營地劏羊，羊肉煲，正。晚上營地安排篝火同煙花，大家又興奮左一輪，兩個小朋友更加系大SHOW電子產品技能。如果早D就入住，就夠時間騎馬去埋高山牧場同湖泊。

我地採既牛肝菌

兩個小朋友既創意相，古下系點影既？

拳頭甘大既牛肝菌

10號，半夜落雨，落到朝早先停，之後雲霧散去，成個營地好似仙境甘，值回票價，仲見到哈巴雪山既頂峯添。

10點出發，行東環線，半路見天氣晴朗，就順路加遊埋白水臺，然後去普達措國家公園。就到香格里拉果陣，叫個仔上網搜下，推左呢間系古城旁邊既“雪域藏家火鍋”，打邊爐，強烈推薦犛牛火鍋同藏香豬肉。

普達措屬都湖

飯後入住“香格里拉祥白藏藝別院”。18年第一次自駕，住系古城，今次專登揀住松贊林寺景區，住店門票有優惠，62蚊位（憑票進松贊林寺），可以多日進出。客棧由老闆兩公婆打理，人好實誠，兩個女放假都系度幫手，如果想系佢地度晚飯，記得預約。客棧就係松贊林寺對面，庭院可以停車，房間夠大，裝修好好，推薦。

11號，又去雪域藏家食晏，酸辣豬腳鍋都好唔錯。再次遊覽獨克宗，五年前嚟果次，系“無塵”買左套好鐘意既茶具，返嚟冇耐就畀“某人”打爛左個茶壺，今次系刻意嚟尋覓既。佢地既鋪面換左地方，好在我地幸運甘偶入左佢既新店，老婆認出左老闆娘（雖然佢兩公婆珠圓玉潤左好多好多），佢做左媽咪，變化好大，冇曬以前果種“你中意買未買囉”既“豪氣”，我仲專登叫埋個仔入嚟，兩家人相見，好有感慨，大家傾左個幾鐘頭先揀嘢埋單。除配返個壺外（梗系某人買單嘎啦），仲揀多個家姐好中意既添，送返去俾佢做生日禮物。 逛完古城，就車遊左下納帕海，食埋飯就返客棧喇。

尋覓“無塵”（老闆娘兩姊妹而家系古城開左兩間“無塵”）

個仔18年、23年既變化

上邊系新配既壺、右下系原先既，雖然唔系襯得好緊要，不過甘都搵得返店家既過程先至系樂趣

搭“蔡蔡”地送返去畀家姐，2000公里“快遞”，啱好趕得切生日

完左五年前既心願，請“蔡蔡”嚟“小菜咖啡”飲咖啡

12號，上午兩公婆行左下松贊林寺，食完晏就出發“德欽碎片吾鄉梅里雪山公館”。雨、多彎，路遇兩單炒車，真系要慢小小開。路過金沙江“奧咪嘎”大彎，停落嚟去影相。而家吾收費喇，不過吾一定繫好事，衛生間根本唔敢入去。

雨觀金沙江“奧咪嘎”大彎

提前同店家約定好菜單，捱晚到後冇耐就可以開飯了，出品ok。公館裝修有品位，設施豪華，價格小貴，左右兩邊都有小高層的酒店起緊，到時希望房價可以平D。雨霧，睇唔到金山。

因爲臨時工作需要，“蔡蔡”一家要縮短一日行程，第二日就返轉頭去瀘沽湖嘞，我地就此告別。

兩家人就係公館門口揮手講再見嘞（我不忍看你，背向我轉面。。。。）

13號，按原計劃，第二日系去千年鹽井後就正式原路回程住飛來寺一晚既。十點，我地一家先行出發，無耐就變到好好天，車度放住個仔D勁歌，開系去尼農峽谷既路上（沒有選擇飛來寺方向，想去睇尼農峽谷既滑索同雨崩既出入口），D感覺凸然間上曬嚟。細恁左下，今日先至系星期日，仲有成個禮拜，點解唔去埋318遮？！一講出嚟，老婆同仔都贊成，停落嚟睇睇個導航，一路暢通，即刻就甘愉快地決定啦（錯過了8月14日的日照金山），果種可以甘突然改變既感覺好得人鐘意。

開左半個鍾，就過左尼農橋，見到廢棄左既尼農吊橋同滑索，我係地圖度留意左呢度好耐，今次系專登過嚟，冇失望，好壯觀，再往前唔遠，就係去雨崩既路口。

晚黑玩手機果陣，都會留意“某音”當地既視頻，可以搵到好多有用既資訊。琴晚就經已睇到G214古水段發生泥石流，話當晚可以搶修完。我地今日中午經過果陣單邊放行，塞左唔夠半個鍾度，算好好彩勒。一點半進入芒康地界入藏！再往前就係西藏昌都公安檢查站，刷身份證就OK。

兩點到比較出名既“鹽井正宗一口面”，30一位，任食，牆上寫住既記錄系147碗，服務員唱住歌跳住舞，搏命甘同你“加一個、加一個”，加一碗就自己系檯面個籬度攞粒石仔記數，D面好普通，不過食既過程就十分愉悅，推薦。

跟住去睇埋西藏鹽井天主教堂同千年鹽井，就出發去芒康，6點到，到左先揀酒店，呢間“芒康柏晶酒店”系主路邊，睇過先入住，250晚，乾淨企理，樓下大院可以停車，系對面小店炒幾個餸就返酒店訓覺勒。

14號，6點半出發，經過呢個系地圖睇過好多次路口，停落嚟望下，覺得總會有機會系度向左轉既（入藏）。

今次轉住右先

遊覽措普溝景區，好驚喜，強烈推薦。原來系可以自駕入去既，不過要提前一天系景區小程序預約。我地唔知道，所以系攜程訂左票，遊客中心大巴，好少遊客，坐13公里先到達景區入邊，整緊路，要開半個鍾。天氣好正，章德草原系後面既扎金甲博神山映襯下，色彩豔麗、好壯觀，頓時覺得無揀錯地方，加上果度仲棟住個318路牌，好夠FEEL。大巴剩系去到措普湖，跟住可以選擇坐電瓶去到最上面既措普寺，跟住順住行返落黎睇兩個細湖同措普湖，完全超越普達措、揮得住九寨。

四點兩出發理塘，原路景色靚到痹，途觀姊妹湖，入住理塘千戶藏寨酒店，就在大路邊，門口可以停車，外賣螺螄粉晚飯。天空之城，梗要少少高反先對得住既，剩系得我一個人頭疼，酒店有製氧機，吸住訓，第朝就無事勒。

15號，7點出發， 系天路18彎度，因爲多車停系路邊，加上有人逆行，塞左半個鍾，其餘路段一路暢通。經過康定機場，巖好見到飛機降落。折多山好多人、好大霧，沒有停留。差唔多三點到康定情歌廣場，江邊馬路無得停車，開去入邊果排就有位。影張相、食個火鍋就出發都江堰，八點入住百倫國際酒店（住兩晚、推薦），樓下商場晚飯。

16號，終於可以嘆返個靚早勒，酒店出品OK，兩公婆撐左兩個鍾臺腳。跟住去酒店泳池，唔知系唔繫系高原返落黎會勁D，游到都唔知攰。成點鐘先出去搵野食，專登去琴晚經過見到好多食肆既都江堰大道三段，揀左呢間“扶搖”，火鍋冇得頂，超正。跟住去逛埋仰天窩廣場同都江堰景區。

17號，今日陪老婆同個仔去睇熊貓（熊貓，N年前都經已唔會去睇嘎啦），而家竟然又網紅返，隔晚訂都剩系得雁晝場，啱曬，又可以食返個兩個鍾既早餐。11點出發去成都大熊貓繁育研究基地，揀左系西門入，人少車少。裏面好大，一定要坐電瓶。逛左兩個半鍾，出發去成都，入住香格里拉酒店。住落先知聽日輪到我尾號限行，三仔乸趁機續住多晚。

18號，中午先出去太古裏，無開車勒，打車都好平，小龍坎火鍋，跟住逛街，系“水果鋪”大出血，個仔就好開心啦。返酒店頂樓下午茶（入住豪華閣禮遇），出品OK，酒水豐富，直頭當埋晚飯。跟住行去東門碼頭錦江夜遊。四川既服務非常好，必須點贊。

19號，正式踏上回家的路。十點出發，五點入住遵義貴州飯店，自助餐128一位，出品非常OK。

20號，八點出發，兩公婆拍住上，12個半鍾返到廣州，全程5200公里，完滿、完美。